عارفانہ کلام حمد نعت منقبت
چشمِ فطرت سے بہے تھے جو بہتر آنسو
آنکھ سے گرتے ہیں وہ بن کے سمندر آنسو
رونے والو! ہے اگر دل میں غمِ آلِ عبا
کربلا جائیں گے ان آنکھوں سے بہہ کر آنسو
تپشِ روزِ قیامت سے بچانے کے لیے
آئیں گے بہرِ سفارش لبِ کوثر آنسو
اہلِ غم ہیں، ہمیں معلوم ہے قیمت ان کی
ہم نہ دیں لعل و جواہر کے برابر آنسو
چشمِ زینبؑ سے بہے تھے جو بروزِ عاشور
بن کے عنوانِ وفا بٹ گئے گھر گھر آنسو
دیکھ کر نعشِ پسر، شاہؑ کہیں رو نہ پڑیں
ورنہ لے جائیں گے دنیا کو بہا کر آنسو
تر بہ تر غنچۂ و گل، شاخ و ثمر، سبزہ و برگ
ہر نئی صبح دکھاتے ہیں یہ منظر آنسو
کون یہ گِریہ کناں ہوتا ہے چھپ کر ہر شب
کس کی آنکھوں سے بہا کرتے ہیں شب بھر آنسو
غمِ مظلومئ شہؑ کرتی ہے ظاہر فطرت
اپنی آنکھوں سے ہر اک رات بہا کر آنسو
سن کے افسانۂ مظلومئ عابد، ساجد
کس کی آنکھیں ہیں جو لے جائیں بچا کر آنسو
ساجد امروہوی
مرزا ساجد حسین
No comments:
Post a Comment