حب روئے یار سے دل شاد رکھ

حُب روئے یار سے دل شاد رکھ

خانۂ ویراں کو تو آباد رکھ

قتل کو کافی نگاہِ ناز ہے

حلق پر خنجر نہ اے جلاد رکھ

رنجِ دنیا اور غمِ عقبیٰ نہ کر

فکرِ این و آں سے دل آزار رکھ

زلفِ پیچاں میں کسی کے ہیں اسیر

کچھ نہ فکرِ دام اے صیاد رکھ

ہم ازل ہی سے ہیں تیرے آشنا

گر بھُلایا ہے تو لے اب یاد رکھ

کچھ نہ حاصل ہو تجھے بے عشق کے

دل میں عشقِ یار کی بنیاد رکھ

موت سے حاصل ہے لطفِ زندگی

موت سے پہلے عدم کی یاد رکھ

ہے قمر زوروں پہ وحشت آج کل

انّ وَعدَاللہ حق یاد رکھ

قمرالدین ہلالی