ہم لوگ جو روتے ہوئے دیہات سے نکلے
صد شکر کیا لعنتِ طبقات سے نکلے
تاریخ بتاتی ہے کہ زندان میں پہنچے
سب شاہ ہمارے جو محلات سے نکلے
پھر ان کے لیے کٹنے لگے گردن و بازو
الفاظ جو کچھ گونگے اشارات حرکات سے نکلے
آدھے سے زیادہ تو حکایات سے نکلے
یہ میرے عقیدے جو کرامات سے نکلے
نبیوں کے گھرانے میں رہا علم کا ورثہ
درویش مگر کوئے خرابات سے نکلے
ہر شہر سے نکلیں گے فلاطون و ارسطو
یہ قوم اگر کوچۂ جذبات سے نکلے
اونچائی پہ آتے ہی گرجنے لگے عرفی
وہ ابر جو دھرتی کے بخارات سے نکلے
عرفان عرفی
No comments:
Post a Comment