بند آنکھوں سے دیکھو گی تو دکھائی دے گا

 جمال کشیدگی

سہیل

سہیل

مڈورا کی لپ سٹک کا گیارہ نمبر شیڈ کیسا ہے

مندر میں لگی گھنٹی کو معلوم ہو گا

کس ہاتھ کے جُنبش میں مسرت ہے

کون سا دست طلبِ حنائی میں بام تک آیا ہے

شدت بتاتی ہو گی افسانے شب خوابی کے

لیکن گھنٹی کا درد کون جانتا ہے

کیونے کا چھ نمبر کلر مجھ پہ سوٹ کرے گا نا

اس جوتے کی ارداس کس آواز میں ہو  گی

جس کو پہننے والے پردیس چلے گئے ہیں

بے جان چیزوں کو بھی محبت ہوتی ہو گی

مجھے لگتا ہے کہ سات نمبر شیڈ ٹرائی کرنا چاہئے

سرمہ ایجاد کرنے والے نے

من چاہے شخص کی آنکھوں میں کیا دیکھا ہو گا

اس کا خمار مصورِ زن سے زیادہ تھا کیا

ہاں پرفیوم سے زیادہ مجھے عطر عود پسند ہے

پہلا دانت جو چھت پہ پھینکا تھا

چڑیا اسے کہاں لے کر گئی ہو گی

بلبل کا بچہ، جو کھاتا تھا کھچڑی

پیتا تھا پانی

واپس نہ آنے میں کیا مصلحت ہو گی

یار آئی لائنر تو اب دو نمبر ہی آ رہے ہیں

بچھڑتے وقت دعائیں دینے والوں کی نفسیات کیا ہے

مار کے چھاؤں میں پھینکنے والوں کی نفسیات کیا ہے

سہیل دیوار پہ کیا دیکھ رہے ہیں آپ

تُم ایک شاعر کی محبت ہو

جمال کشیدگی ہے وصف جس کا

بند آنکھوں سے دیکھو گی

تو دکھائی دے گا

سہیل کاہلوں