تشنہ کامی کا یہ الزام اتارا جائے

 تشنہ کامی کا یہ الزام اتارا جائے

اک سمندر مِرے ہونٹوں سے گزارا جائے 

گفتگو کرنی ہے اک شخص کی سیرت سے مجھے

آسمانوں سے فرشتوں کو اتارا جائے

حضرتِ قیس مِرے حق میں گواہی دیں گے

اب سرِ دشت مِرا نام پکارا جائے

زندگی تُو تو گوارا ہے مگر اس کے بغیر

مسئلہ یہ ہے تجھے کیسے گزارا جائے

میں حسینی بھی ہوں تشنہ بھی ہوں سچا بھی ہوں

مجھ کو پانی سے بہت دور نہ مارا جائے 

اپنے گھونگھٹ میں ایک جھنگ لیے بیٹھی ہے

اس کی جانب بھی کوئی تخت ہزارا جائے

کب تلک اس پہ رہوں گا میں لٹکتا عرفان

مجھ کو احساس کی سولی سے اتارا جائے

عرفان صادق