میں شجر ہوں شہرِ ملال کا مِری ٹہنیوں کو نہال کر
کبھی بھیج اپنی نوازشیں کسی جامِ ابر میں ڈھال کر
مجھے خار خار مسافتوں کی ستمگری نے تھکا دیا
مجھے منزلوں کا سراغ دے مِرے حوصلے کو بہال کر
میں چراغ خانہ درد ہوں تیری کائناتِ بسیط میں
مجھے بھیگی رات میں پھیلتی ہوئی چاندنی کی مثال کر
مِری عمر بھر کی سیاہیاں میرے لب پہ مہر لگا گئیں
مِری روح میں گھلی تشنگی مجھے کہہ رہی ہے سوال کر
گھنے جنگلوں کے حصار میں مِرا عشق بھی مِری عقل بھی
رہِ شہرِ امن دکھا مجھے کڑی گردشوں سے نکال کر
میرے بے جواز وجود پر تیری رحمتوں کا جواز ہیں
وہ ندامتیں جنہیں آنکھ میں کبھی رکھ لیا تھا سنبھال کر
فوزیہ تاج
No comments:
Post a Comment