کسی کے ہاتھ سے اک پھولدان ٹوٹا تھا

کسی کے ہاتھ سے اک پھولدان ٹُوٹا تھا

اور اس کے ساتھ دلِ بدگُمان ٹوٹا تھا

زمیں پھٹی نہ کہیں آسمان ٹوٹا تھا

بچھڑتے وقت فقط ایک مان ٹوٹا تھا

مآلِ کشمکشِ سنگ و آئینہ مت پوچھ

جو ٹوٹنا تھا وہی میری جان ٹوٹا تھا

چھپی ہوئی تھی ندامت ہوا کے لہجے میں

کہ اب کے پیڑ نہیں باغبان ٹوٹا تھا

اسی کی چیخ کو پھر سے الاپنا تھا مجھے

وہ ایک سُر جو کہیں درمیان ٹوٹا تھا

تِرے بیان میں کچھ تو کمی رہی ہو گی

تِرا طلسم سرِ داستان ٹوٹا تھا

ہوا کے ساتھ کچھ اپنے بھی کارفرما تھے

پھٹا نہیں تھا، مِرا بادبان ٹوٹا تھا

اسد رحمان