قاتل نظر ہے ٹھیک تو حسن ادا بھی ٹھیک

 قاتل نظر ہے ٹھیک تو حسنِ ادا بھی ٹھیک

گوری ہتھیلیوں پہ ہے رنگِ حنا بھی ٹھیک

کانٹوں پہ ہوں میں اور وہ پھولوں کی سیج پر

وہ تاجدارِ حُسن، میں اس کا گدا بھی ٹھیک

انجام کیا ہو دیکھیۓ، اس دل کا عشق میں

اس کی جفا بھی ٹھیک ہے، میری وفا بھی ٹھیک

میں عشق کا بیمار ہوں، رہنے دے لادوا

اے چارہ گر! ہے میرے لیے یہ دوا بھی ٹھیک

تنقید کرنا شوق سے میرے لباس پر

کر لیں حضور! آپ یہ اپنی قبا بھی ٹھیک

میں ہوں شعیب! ایک مسافر، مِرے لیے

گلشن بھی ٹھیک، دشت کی آب و ہوا بھی ٹھیک

شعیب مظہر