طرز میں اجتناب سا کچھ ہے

 طرز میں اجتناب سا کچھ ہے

رُخ پہ بھی اضطراب سا کچھ ہے

مہر سا ماہتاب سا کچھ ہے

اس کا پرتُو جناب سا کچھ ہے

اس پہ تکیہ کریں تو کیسے کریں

زندگانی حباب سا کچھ ہے

چاندبدلی کی اوٹ میں یوں لگا

رُخ پہ جیسے نقاب سا کچھ ہے

سلسلہ زندگی کا کیا کہیۓ

خواب در خواب خواب سا کچھ ہے

دلبرا! تیرے اک تغافل پر

دل پہ گزرا عذاب سا کچھ ہے

حالتِ دل تو ہم چھپا لیتے

حال بھی تو خراب سا کچھ ہے

کچھ ہیں تیور تمہارے شوریدہ

اور زمانہ خراب سا کچھ ہے

ہر نظر باب زندگی کا ہے

اس میں لکھا نصاب سا کچھ ہے

ایک چہرہ کتاب جیسا ہے

رقم اک انتساب سا کچھ ہے

گو میں قائل نہ کر سکی اس کو

لیک وہ لا جواب سا کچھ ہے

درِ دل میں بسا لیا ہے جو

طاہرہ! انتخاب سا کچھ ہے

طاہرہ مسعود