تِرے لہو نے غبارِ گُماں کو صاف کیا
تِری نظر پہ حقیقت نے انکشاف کیا
شکستہ جسم تِری قبلہ گاہی پر میں نثار
بدن دریدہ فرس نے تِرا طواف کیا
بکھر گیا تھا سرِ دشت کوئی مصحفِ گل
ہوا نے ریت کو ہر برگ کا غلاف کیا
یہ خاندانی روایت تھی حق شعاری کی
علی کے بیٹے نے کثرت سے اختلاف کیا
ستم رسیدہ تھے لیکن انا گزیدہ نہ تھے
گناہ گار کو بھائی کہا،۔ معاف کیا
سنے جو شاہ کے ہونٹوں سے صبر کے احکام
پھر ایک خیمے میں غیرت نے اعتکاف کیا
وہ جس کے زخموں سے ہوتا رہا ہوا کا گزر
اسی کے ذکر نے ہر سنگ میں شگاف کیا
ہے ممکنات پہ قادر حسینؑ ابنِ علیؑ
بوقتِ عصر مشیت نے اعتراف کیا
جو آ ملا اسے شہ نے خوش آمدید کیا
اور اس کو جانے دیا جس نے انحراف کیا
عدنان محسن
No comments:
Post a Comment