تنہا کوئی بھی ہو سکتا ہے

 تنہا

تنہا کوئی بھی ہو سکتا ہے

سات لوگوں کے خاندان میں سب سے خوش رہنے والا

دوستوں میں سب سے زیادہ بولنے والا

شہر کے بڑے بازار کے

کرائے کے اس فلیٹ میں رہنے والا

جس کی بیرونی کھڑکی سے

ہر وقت لوگ نظر آتے ہیں

گاؤں کے مکان میں چھت کے واحد کمرے میں رہنے والا

جس کے پاس گاؤں والے اپنی دستاویزات سمجھنے آتے ہیں

روز شام کو دریا کنارے چلتے ہوئے

فون پہ کسی سے باتیں کرنے والا

ہر دن کسی کے ساتھ چائے پینے والا

دفتر میں دیر سے پہنچنے اور جلدی نکلنے والا

سوال کرنے اور ہر جواب رکھنے والا

محبت کی نظمیں لکھنے والا

تمہارے ساتھ ساتھ چلنے والا

تنہا کوئی بھی ہو سکتا ہے

وسیم عباس