لگائی کس نے سینوں میں اگن ہے
سلگ اٹھا مِرا پیارا وطن ہے
جگاؤ مت ابھی منکر نکیرو
چڑھی لمبی مسافت کی تھکن ہے
نظر چوکی کہ ڈس لیتی ہے بیرن
سیاست کی زباں ناگن کا پھن ہے
ٹپکتا ہے لہو آنکھوں سے دل کا
کیا یاد یار کانٹوں کی چبھن ہے
سکوت آب ان کے چاند رخ پر
مِرے دل میں سمندر موجزن ہے
جسے کشمیر کہتا ہے زمانہ
وہ پہلی رات کی بیوہ دلہن ہے
ہوائیں گرم ہوں ٹھنڈی کہ نم ہوں
گلستاں ساز میرا گل بدن ہے
ساز دہلوی
No comments:
Post a Comment