طنابِ خیمۂ جاں چشمِ خواب کھینچتے ہیں
جو جا چکے ہیں مِرے دستیاب کھینچتے ہیں
مِرے وجود کو جونکیں لگا تسلی کی
یہ وسوسے تو رگوں سے شباب کھینچتے ہیں
انہیں اداسی کی جادو گری کا علم نہیں
یہ کم نظر ہیں تِرا سدِ باب کھینچتے ہیں
مِلو کہ لاشۂ الفت پہ کُھل کے رقص کریں
مِلو کہ مِل کے خطِ اجتناب کھینچتے ہیں
جو میں نے کہنا تھا پہلے سے کہہ رہا ہے کوئی
یہ کس کے ہونٹ مِرا انتخاب کھینچتے ہیں
خدا بھی اپنے بنے دائرے میں رہتا ہے
نجانے لوگ کسے بے حساب کھینچتے ہیں
کھنچے تو آتے ہیں آوازِ پا پہ باہر تک
پھر اپنا آپ کہاں بازیاب کھینچتے ہیں
نظارگی کا رِدھم توڑنا پڑے گا یہیں
پسِ نظارہ مجھے کچھ حِجاب کھینچتے ہیں
عقیل عباس چغتائی
No comments:
Post a Comment