ہو تو سکتا ہے کسی دیو کے جیسے میں بھی

تذبذب

ہو تو سکتا ہے کسی دیو کے جیسے میں بھی

لے اڑوں تجھ کو کہیں دور کی دنیاؤں میں

دل کی دیواروں میں لو تیری مقید کر کے

تشنہ آشاؤں کے قلعے کو منور کر لوں

خواب دیرینہ کی تعبیر بنا کر تجھ کو

اپنی آنکھوں کے کواڑوں میں مقفل کر لوں

ساری دنیا کی نگاہوں سے چھپا کر تجھ کو

لے اڑوں رینگتے بل کھاتے ہوئے رستوں پر

جو پہاڑوں کے بدن کاٹ کے اوپر کی طرف

سبز کائی سے اٹے محلوں پہ جا رکتے ہیں

خود غرض ہو کے تجھے قید میں رکھوں ایسے

ذی نفس کوئی نہ ہو چار چفیرے تیرے

اپنی تنہائی کی وحشت کو مٹانے کے لیے

ڈھونڈ پائے نہ کسی کو تو سوائے میرے

صرف اک میں ہوں اور اک تو ہو رفاقت کے لیے

ماسوا میرے نہ ہو کوئی محبت کے لیے

لیکن اے پھول صفت دیکھ کے صورت تیری

سوچتا ہوں کہ اگر باغ جہاں سے تجھ کو

توڑ بھی لوں گا تو تو کیسے جیے گی آخر

رنگ ہا رنگ مہکتے ہوئے پھولوں سے پرے

دور افتادہ پر اسرار خرابے میں قیام

درد کے پھیلتے سائے میں کہاں ممکن ہے

تجھ تر و تازہ کا خوش رہنا چٹکنا کھلنا

میری ویران سرائے میں کہاں ممکن ہے

اویس ملک