حرام زندگی کا نوحہ
ہم عجیب لوگ تھے
بڑے عجیب لوگ
ہم وہ لوگ تھے جنہیں
إِنَّ الْإِنْسَانَ لَفِی خُسْرٍ کہہ کر خبردار کیا گیا
ہماری ماؤں نے ہمیں اس وقت جنا
جب غذاؤں کی قلت سے
لوگ مر رہے تھے
ہمیں ورثے میں
باپ کے نُطفے میں موجود بیماری ملی
ہم نے سودے بازی کی
سمندروں میں آٹے کی گولیاں پھینک کے
خدا سے اپنی مرضی کے کام نکلوائے
یہاں تک کہ ہمارے منہ کو
سُود کا ذائقہ آن لگا
ہم نے تسبیح کے دانوں میں
خدا کو چکر دئیے
اور حرام لقمے اپنے شِکم میں اتارے
پرندوں کو حرام کا دانا ڈالا
تو ہمارے سروں پر بِیٹ کی گئی
ہم نے صرف وہ کیا
جس کی اجازت ہم سے چھین لی گئی
ہم روئے، بہت روئے
اپنی بے بسی پہ روئے
کیونکہ ہم فطرت سے رونا جانتا تھے
ہم نے گناہ کیے، خوب کیے
اور ہاتھوں کی کالک کو
شہر کی اجلی دیواروں پہ چھاپ دیا
ہم نے سگریٹوں کے کش کھینچے
اور راتوں میں مباشرت کی
کچی شرابوں سے منہ دھوئے
عورتوں پہ جملے کسے
انہیں ہراساں کیا
جوانوں کو چھلنی کیا
بوڑھوں کو گالیاں بَکیں
بچوں کو یتیم کیا
ہم نے کتوں سے بھونکنا سیکھا
اور وفاداری کی ہڈی ان کے منہ میں ڈال دی
ہماری زبانوں پہ پسینہ آیا
تو ہم نے معاشرے کے منہ پہ تھوک دیا
ہم نے ہوا کی تیز لہروں میں
جہازوں کے ساتھ بھاگنے کی مشقیں کیں
اور خود سے ٹکرا کے پاش پاش ہوئے
ہم شاہراہوں پر چلنے والی گاڑیوں کے ساتھ
بھاگتے بھاگتے زندگی کی دوڑ ہار گئے
ہماری آخری ہچکیاں
برانڈڈ گاڑیوں کے ہارن لے اڑے
اور ہماری تعفّن زدہ لاشوں سے
شہر میں وبائیں پھوٹ گئیں
ارسلان عقرب
No comments:
Post a Comment