چھوڑ کر شہر بیابان میں آ جاتا ہے
چاک جس کے بھی گریبان میں آ جاتا ہے
تُو اسے کچھ بھی کہے پر یہ قصیدہ گوئی
اک رویہ ہے جو دربان میں آ جاتا ہے
تُو بچھڑ جا کہ تِرا خوفِ جدائی اکثر
دل سے جاتا ہے تو اوسان میں آ جاتا ہے
جب بھی چلتا ہوں کہیں رختِ سفر باندھ کے میں
دل کا اک چور ہے سامان میں آ جاتا ہے
رات کے پچھلے پہر ضبط کا آنسو پی کر
درد کم ظرف ہے دالان میں آ جاتا ہے
یوں بھی ہوتا ہے کئی بار تِرا سارا غم
میری اک چھوٹی سی مُسکان میں آ جاتا ہے
ہو بہو تیری طرح ایک ضرورت بن کر
کاغذی پھول بھی گُلدان میں آ جاتا ہے
جس پہ کرتا ہوں اترنے کا ارادہ راجا
وہ کنارہ کسی طوفان میں آ جاتا ہے
اویس راجا
No comments:
Post a Comment