چھوڑ جاتے ہیں مرے یار مجھے غاروں میں

 چھوڑ جاتے ہیں مِرے یار مجھے غاروں میں

میری تنہائی کھلا کرتی ہے تہواروں میں

حسن بڑھتا ہے اگر زخم سلیقے سے لگیں

کیسا دلکش نظر آتا ہے فلک تاروں میں

تجھ کو معلوم نہیں لذتِ لمسِ اول

تُو بہت بعد میں آیا ہے طرحداروں میں

رات بھر میں نے چراغوں کو لہو سے سینچا

کیوں مِرا نام نہیں صبح کے معماروں میں

بے گھری ہم نے بھرم رکھا ہے تیرا، ورنہ

شب کو سائے بھی پلٹ جاتے ہیں دیواروں میں

عالمِ ردِ طرب دیکھ مجھے ہنستا ہوا

ایسا کرتا ہے کوئی اور زیاں کاروں میں

سلسلہ وار سفر کرتی ہوئی نسبتِ خاص

معتبر آج بھی ہے غارِ حرا غاروں میں

حسنِ نازک کو ملی سخت مزاجی کی فضا

  آئینہ زخمی ہوا آئینہ برداروں میں

خلوتِ خاص کا عنصر تھا مگر کچھ کم ظرف

لذتِ گریہ اٹھا لائے ہیں بازاروں میں

مسکرانا تو عقیل اور ہے، خوش رہنا اور

ہر ہرا پیڑ نہیں گنتے ثمر داروں میں

عقیل عباس چغتائی