وقار صدق کہاں تھا حضور سے پہلے

 عارفانہ کلام حمد نعت منقبت

وقارِ صدق کہاں تھا حضورﷺ سے پہلے

دلوں پہ سچ بھی گِراں تھا حضورﷺ سے پہلے

گھٹائیں جہل کی چھائی تھیں رُوئے عالم پر

سحر پہ شب کا گُماں تھا حضورﷺ سے پہلے

ہر ایک شخص تھا نالاں نسب پرستی سے

زمانہ وقفِ فُغاں تھا حضورﷺ سے پہلے

دیارِ فہم و فراست بھی وائے محرومی

غریقِ سَیلِ رواں تھا حضورﷺ سے پہلے

بُتوں کی ہرزہ سرائی پہ بھی سرِ عالم

عجیب ہو کا سماں تھا حضورﷺ سے پہلے

گلی گلی میں تجارت تھی آدمیت کی

تمام سود، زیاں تھا حضورﷺ سے پہلے

بہار پر تو جو گُزری گُزری چکی ہو گی

خزاں کو خوفِ خزاں تھا حضورﷺ سے پہلے

زمیں میں دُخترِ زندہ کو دفن کر دینا

یہی انا کا نشاں تھا حضورﷺ سے پہلے

غضب تو یہ ہے خدائے جہاں کے گھر پر بھی

صنم کدے کا گُماں تھا حضورﷺ سے پہلے

لبِ سخن پہ قصیدے تھے ظلمتِ شب کے

یہی فروغِ بیاں تھا حضورﷺ سے پہلے

نجومِ شب کو تو چھوڑو سحر کا سورج بھی

سحابِ غم میں نہاں تھا حضورﷺ سے پہلے

اُلجھ کے شرک میں پیرِ حرم بھی اے راسخ

شہیدِ عشقِ بُتاں تھا حضورﷺ سے پہلے

راسخ عرفانی