کبھی چراغ کبھی سائباں بناتی ہے

 کبھی چراغ کبھی سائباں بناتی ہے

ہماری شُعلگی بُجھ کر دُھواں بناتی ہے

پڑا ہو جیسے مسافر گھنیری چھاؤں میں

کسی کی یاد بھی ایسا سماں بناتی ہے

اُسے کہو کہ محبت سے دُور دُور رہے

یہ دل پہ رنج کے پختہ نشاں بناتی ہے

فرشتے ان کی مہک سے زمیں پہ آتے ہیں

وہ روٹیاں جو مِرے گھر پہ ماں بناتی ہے

اور اب تو پاؤں بھی زخمی ہیں زندگانی کے

جہاں جہاں سے بھی گُزرے نشاں بناتی ہے

 

ادریس روباص