ہر ایک شعر آیت قرآن نعت ہے

 عارفانہ کلام حمد نعت منقبت

ہر ایک شعر آیتِ قرآنِ نعت ہے

جو حصر سے ورأ ہے، وہ احسانِ نعت ہے

انسان خوش نصیب بہ فیضانِ نعت ہے

کیا خوب رفعتوں پہ یہ ایوانِ نعت ہے

مخصوص شاعروں سے کہاں خوانِ نعت ہے

سارے جہاں پہ سایۂ دامانِ نعت ہے

کوئی نبیؑ نہ سرور جیش رُسلؑ ہوا

ہاں مصطفیٰؐ کی ذات جو شایانِ نعت ہے

نُکتہ کُھلا یہ آیۂ صلوا علیہ سے

یعنی اس امر میں چُھپا فرمانِ نعت ہے

کس کا گُزر ہے ناحیۂ حق میں اس طرح

شایاں مِرے حضورؐ کو عنوانِ نعت ہے

شاہ جہاں، امام صور، خواجۂ ازل

ختمِ رُسلؐ ہی زینتِ ایوانِ نعت ہے

کیسی غرض مطاعم فردوس آز سے

درویش کو عزیز نمکدانِ نعت ہے

تِیرہ بساط زیست تھی، پُر نُور ہو گئی

عشقِ رسولؐ شمعِ شبستانِ نعت ہے

یہ تذکرہ نہیں ہے زُلیخائے مصر کا

ہُشیار! کُوئے یوسفِ کنعانِ نعت ہے

دارائے شعر بھی ہو یہاں یہاں ہوش باختہ

اللہ رے، کیا ہی شوکتِ ایوانِ نعت ہے

ہم کُشتگانِ چشمِ ولا کو خوشا نصیب

اسبابِ حمد ہیں، کہیں سامانِ نعت ہے

توفیق دے خدا تو ملے گنجِ آگہی

عالم سے بڑھ کے دولتِ عرفانِ نعت ہے

اس دورِ افتراق و تعصب گُزیدہ میں

درکار ہر بشر کو ہی درمانِ نعت ہے

اخلاصِ جاں، نہ فہم و تدبر، نہ سوزِ دل

لائق رفُو کے چاک گریبانِ نعت ہے

خیراتِ فکر و فہم اسے بخشیۓ حضورؐ

رومی عجم میں آپؐ کا حسانِ نعت ہے

خالد رومی