لطف و سرور و کیف جو دوران نعت ہے

 عارفانہ کلام حمد نعت منقبت

لطف و سرور و کیف جو دورانِ نعت ہے

نخلِ دل و نظر پہ یہ بارانِ نعت ہے

ہر اک ظہور پرتوِ اعیانِ نعت ہے

"ہر گوشۂ حیات میں اِمکانِ نعت ہے"

اس عالمِ خراب میں صحرائے خواب میں

صد شکر ہم پہ سایۂ مژگانِ نعت ہے

گُلہائے رنگا رنگ ہیں اسمائے شاہِ دیںؐ

دامان نو بہار یہ دامانِ نعت ہے

میثاقِ مصطفیٰؐ تھا جو یومِ الست تھا

قالُو بَلا تو اصل میں پیمانِ نعت ہے

ان کی قبولیت سے سخن کو ہے استجاب

اک لفظ بھی کہاں مِرا شایانِ نعت ہے

روشن دل و دماغ ہیں حُبِ رسولؐ سے

طیبہ کی خاک سُرمۂ چشمانِ نعت ہے

اشرف درِ حضورؐ تلک لے کے جائے گا

اس دستِ نارسا میں جو دامانِ نعت ہے

اشرف یوسفی