سحر بھی اپنے لہو سے جگا رہے ہیں حسین

 عارفانہ کلام حمد نعت منقبت

سحر بھی اپنے لہُو سے جگا رہے ہیں حسینؑ

خُدا کی راہ میں سر بھی کٹا رہے ہیں حسینؑ

بکھرتی فِسق کی تصویر ریگِ صحرا پر

زمانہ دیکھ رہا ہے، دِکھا رہے ہیں حسینؑ

فضائے کرب و بلا سے یہ آ رہی ہے صدا

وفا نِبھاتے ہیں کیسے، بتا رہے ہیں حسینؑ

بڑے گھمنڈ سے آیا تھا لشکرِ باطل

غرور خاک میں اس کا مِلا رہے ہیں حسینؑ

بلا کا شور ہے، چاروں طرف ہے ہنگامہ

صدائے جہدِ مُسلسل لگا رہے ہیں حسینؑ

فلک پہ سُرخی شفق کی نہیں، لہُو ہے یہ

کہ اپنے خُون سے کربل سجا رہے ہیں حسینؑ

نہ کیوں ہو ناز بہت میر اپنی قسمت پر

کہ یاد ہم کو ہمیشہ سے آ رہے ہیں حسینؑ

اشتیاق میر