اس لیے بھی وه مجھے دل سے نہیں ملتی ہے

 اس لیے بھی وه مجھے دل سے نہیں ملتی ہے

اس کی مشکل مِری مشکل سے نہیں ملتی ہے

وقت تسلیم بھی کرتا ہے نہیں بھی ہم کو

داد ملتی ہے مگر دل سے نہیں ملتی ہے

تُو ابھی ہجر کی بھٹی میں نہیں ٹھیک پکا

تیری تصویر ابھی سِل سے نہیں ملتی ہے

کیسے قزاق کے قبضے میں سمندر آیا

اب کوئی سیپی بھی ساحل سے نہیں ملتی ہے

کسی منظر میں مِری آنکھ لگے بھی کیسے

کوئی بھی چیز تِرے تل سے نہیں ملتی ہے

جتنی محنت میں محبت میں کیا کرتا ہوں

اتنی اجرت مجھے اس مل سے نہیں ملتی ہے

مہر فام