نہ ان کو اور نہ ان کی انجمن کو یاد کرتے ہیں
یہاں ہم صرف یارانِ کہن کو یاد کرتے ہیں
صبا کے ساتھ بوئے گل بھی آج آئی ہے زنداں تک
چمن والے اسیرانِ چمن کو یاد کرتے ہیں
نہ جانے مصر کی تاریکیوں میں کب بہار آۓ
کئی یعقوب بوئے پیرہن کو یاد کرتے ہیں
نہ شیریں کی کہانی کو نہ خسرو کے فسانے کو
جنون والے جنونِ کوہکن کو یاد کرتے ہیں
وہ لمحے شمع بن کر جلے ہیں اولِ شب سے
وہ لمحے صبح کی پہلی کرن کو یاد کرتے ہیں
اکھٹا ہوتے ہیں جب بھی کہیں دو چار ہم صورت
دلِ مرحوم! تیرے بانکپن کو یاد کرتے ہیں
جو دو اک نشترِ دشنام چلتے ہیں تو کیا راہی
بہت سے لوگ تجھ کو تیرے فن کو یاد کرتے ہیں
راہی معصوم رضا
No comments:
Post a Comment