کوئی وقت تھا یہاں شہر اک تھا بسا ہوا وہ کہاں گیا

 کوئی وقت تھا یہاں شہر اِک تھا بسا ہُوا وہ کہاں گیا

یہیں اک محل لبِ آب جُو تھا بنا ہوا وہ کہاں گیا

وہ جو چاند میرے اُفق پہ تھا مجھے کیا خبر کہاں چھُپ گیا

وہ جو پھُول اک میرے صحن میں تھا کھلا ہوا وہ کہاں گیا

کوئی کامگار تھا بیچ کے کوئی ہوشیار خرید کے

پہ زرِ قلیل میں مال کو تھا بکا ہوا وہ کہاں گیا

مِرے ہم نفس! مِرے ہم نوا! تجھے یاد شاید نہیں رہا

تِرا عہد وہ کبھی تُو نے جو تھا کیا ہوا وہ کہاں گیا

کبھی میرے سینے میں میٹھی میٹھی سی اک کسک تھی وہ کیا ہوئی

کبھی میرے پہلو میں اِک دل تھا دُکھا ہوا وہ کہاں گیا

میری ڈائری میں کسی جگہ تیرے دستخط تھے میں ڈھونڈ لوں

کہیں ایک خط تِرے ہاتھ کا تھا لکھا ہوا وہ کہاں گیا

وہ مِرے سرہانے فریم تھی کوئی سجی ہوئی کہاں کھو گئی

مِری قبر پر جو چراغ اک تھا جگا ہوا وہ کہاں گیا

مِرا ہم صدا، مِرا ہم ادا، وہی میرا عابدِ خوش نواز

وہ مِری غزل میں جو نام اک تھا سجا ہوا وہ کہاں گیا

عابد جعفری