ایمان ہے وابستہ اقرار محمد سے

 عارفانہ کلام حمد نعت منقبت

ایمان ہے وابستہ اقرار محمدﷺ سے

کونین منور ہیں انوارِ محمدﷺ سے

دنیا کے حوادث سے ہونے کا نہیں کچھ بھی

جب تک رہے ربط اپنا دربار محمدﷺ سے

اسرا کلامِ حق ظاہر ہوئے دنیا پر

کردارِ محمدﷺ سے گفتارِ محمدﷺ سے

فکرِ شہِ طیبہ بھی داخل ہے عبادت میں

چمکاؤ نصیب اپنا اذکارِ محمدﷺ سے

پھیلی ہے عجب خوشبو احساس کے دامن میں

آئی ہے صبا جب سے گلزارِ محمدﷺ سے

معراج کی شب آقاﷺ اک پل میں گئے آئے

کیا برق کا نسبت ہے رفتارِ محمدﷺ سے

دیدارِ الہیٰ ہے حصہ ان ہی لوگوں کا

جو لوگ مشرف ہیں دیدارِ محمدﷺ سے

سیرت کی سمجھنا ہی قرآں کو سمجھنا ہے

قرآن الگ کب ہے کردارِ محمدﷺ سے

ہے اپنی مسیحائی پر ناز جنہیں اکمل

پائے ہیں شفا وہ بھی بیمارِ محمدﷺ سے

اکمل آلدوری