جبین تشنہ لبی پر اگر نہ بل آتا

 جبینِ تشنہ لبی پر اگر نہ بل آتا

تو جانے دستِ ہوس کتنے جام چھلکاتا

سکوتِ آخرِ شب اور کربِ تنہائی

تِرے خیال سے اے کاش دل بہل جاتا

یہ سچ ہے کچھ نہ مِلا تیری یاد سے اے دوست

تجھے بھلاتا تو اپنی وفا پہ حرف آتا

نہ مے کدہ، نہ ساقی، نہ حلقۂ رِنداں

کہاں سے ڈھونڈ کے پینے کا حوصلہ لاتا

تِرے جمال کی ہر سمت گُل فشانی تھی

تِری تلاش میں وحشی تِرا کدھر جاتا

محمود الحسن کنجاہی