دل کیوں نہ چاک کر دوں چاکِ جگر کے بدلے
وہ پھول پھینکتے ہیں تیرِ نظر کے بدلے
اللہ! آج کیا ہے جو آنسوؤں کے قطرے
لائے ہیں لختِ دل کو لختِ جگر کے بدلے
کم ظرفئ نظر کا دیکھا فریب دیکھا
آئینہ پوجتا ہوں، آئینہ گر کے بدلے
دن ہے تو بیقراری، شب ہے تو آہ و زاری
کچھ اور اب عطا کر قلب و جگر کے بدلے
اب حال پوچھتے ہیں وہ باغِ آرزو کا
جب خاک اڑ رہی ہے گلہائے تر کے بدلے
یا شام ہی شبِ غم کی بے سحر ہے فاضل
یا آئے گی قیامت اس کی سحر کے بدلے
فاضل کاشمیری
No comments:
Post a Comment