گلی گلی ہے اندھیرا کوئی صدا تو ملے
گُھٹی گُھٹی سی فضا ہے کہیں ہوا تو ملے
میں اپنے چہرے کی ویرانیاں کُھرچ ڈالوں
بس ایک لمحے کو جینے کا ذائقہ تو ملے
اسی لیے تو اُڑائی ہیں دھجیاں اپنی
جنوں کو شعلہ مزاجی کا کچھ مزہ تو ملے
بس ایک نقد نفس ہے سو کیا کروں اس کو
کہاں جُھکاؤں یہ سر، کوئی پارسا تو ملے
میں اور قدروں کا ہوں ماحضر ہے مجبوری
یہاں سے بھاگ نکلنے کا راستہ تو ملے
چلو کہ ڈُوبتے سُورج کو پھاند کر دیکھیں
یہاں کوئی نہیں، شاید اُدھر خُدا تو ملے
کچھ اس مقام پہ لائی ہے خُودسری مجھ کو
تڑپ رہا ہوں کوئی صُورت آشنا تو ملے
اسی خلش میں گنوائے ہیں دو جہاں حمدون
کسی بھی طور کہیں دورِ سابقہ تو ملے
حمدون عثمانی
No comments:
Post a Comment