نظر سے سب کی پنہاں ہے جو اندازِ نظر اپنا
کہیں مٹی میں مل جائے نہ سب کسبِ ہنر اپنا
محیطِ سوزِ عالم ہے اگر سوزِ ہنر اپنا
بقدرِ وسعتِ دل چاہیے دردِ جگر اپنا
غزل گوئی کی تہمت کیوں مِرے ذوقِ جنوں پر ہی
نہیں منت کشِ رسمِ ہنر، ذوقِ ہنر اپنا
ہر اک کا درد ہی باعث اگر ہے درد کا اپنے
کہاں تک چارہ جوئی کر سکے گا چارہ گر اپنا
پئے توسیع فن دار و رسن ہیں منتظر میرے
بہت منت کشِ توفیق دشمن ہے ہنر اپنا
قدم صدیوں کے اوپر ہیں نظر صدیوں سے آگے ہیں
نئی تعمیر میں سرمست ہے ذوقِ ہنر اپنا
یہی اک انتقام اپنا بہت کافی ہے دنیا سے
اگر غصہ میں دنیا سے چھپا رکھوں ہنر اپنا
ابھی سے چشمِ خوں آلود کو کیوں روئیے انور
ابھی تو عام ہونا ہے مذاقِ چشمِ تر اپنا
عشرت انور
No comments:
Post a Comment