فطرتاً مائل خطا ہوں میں
کون کہتا ہے پارسا ہوں میں
آفتوں میں گھرا ہوا ہوں میں
لذتِ غم سے آشنا ہوں میں
مٹھی بھر خاک ہی سہی لیکن
اس کی صنعت کی انتہا ہوں میں
بادِ صر صر کا تند جھونکا وہ
ٹمٹماتا ہوا دِیا ہوں میں
مانتا ہوں مِرا خُدا ہے تُو
رحمتیں تیری جانتا ہوں میں
مجھ پہ کیوں شبہ ہو گیا صاحب
آپ کا، صرف آپ کا ہوں میں
اب تو سو جانے دیجیے نامی
رات بھر کا جگا ہوا ہوں میں
نامی نادری
No comments:
Post a Comment