ندامت سے سبکساری جو پہلے تھی سو اب بھی ہے

 جو پہلے تھی سو اب بھی ہے

ندامت سے سبکساری جو پہلے تھی سو اب بھی ہے

صداقت سے گراں باری جو پہلے تھی سو اب بھی ہے

مزاجوں میں وہ مکاری جو پہلے تھی سو اب بھی ہے

دلوں کو سچ سے بیزاری جو پہلے تھی سو اب بھی ہے

تخیل میں بظاہر انقلاب آیا تو ہے لیکن

ستم کی گرم بازاری جو پہلے تھی سو اب بھی ہے

سمجھتے تھے کہ آزادی مسرت لے کے آئے گی

غریبی اور ناداری جو پہلے تھی سو اب بھی ہے

نہیں اب تک ہمارے ظاہر و باطن میں یک رنگی

نمائش اور مکاری جو پہلے تھی سو اب بھی ہے

فرنگی کی اسیری سے تو آزادی ملی لیکن

غلامی کی فضا طاری جو پہلے تھی سو اب بھی ہے

زمانہ کچھ کہے لیکن یہ اک روشن حقیقت ہے

رضی اپنی وضعداری جو پہلے تھی سو اب بھی ہے

رضی بدایونی

مولوی رضی احمد