عارفانہ کلام حمد نعت منقبت
تصدق دل و جاں حبیبِ خدا
فدا دین و ایماں حبیبِ خدا
تِرے عشق کا جس کو تمغہ ملے
گدا ہو سلیماں حبیبِ خدا
تُو ہی درد میرا رہے اور تُو
مِرے دل کا درماں حبیبِ خدا
تِری یاد میں اشک جاری رہیں
تھمے یہ نہ طوفاں حبیبِ خدا
ہو آتشِ ہجر سے آپ کے
میرا سینۂ بریاں حبیبِ خدا
یقیں ہے کہ بر لائیں گے بالضرور
مِرے دل کے ارماں حبیبِ خدا
میں صحرائے طیبہ پہ قرباں کروں
گلستاں رضواں حبیبِ خدا
صفائی ہو حاصل مِرے قلب کو
نظر آئے جاناں حبیبِ خدا
تمنائے دیدار کب تک رہے
دکھا رُوئے تاباں حبیبِ خدا
ہو لطف و کرم مجھ پہ تیرا مدام
او سلطانِ خوباں حبیبِ خدا
جو پہنچوں مدینہ نہ روکے مجھے
تِرے در کا درباں حبیبِ خدا
رہوں پا بہ زنجیر محشر تلک
دکھا زلفِ پیچاں حبیبِ خدا
قمر کو خدا کے لیے حشر میں
نہ کیجے پشیماں حبیبِ خدا
قمرالدین ہلالی
No comments:
Post a Comment