وہ دل درد آشنا نہ رہا

 وہ دل درد آشنا نہ رہا

زندگی میں کوئی مزا نہ رہا

آ کہ مرگ و حیات میں اے دوست

آنِ واحد کا فاصلا نہ رہا

اب کہاں وہ مزے محبت کے

جورِ بے گانۂ وفا نہ رہا

ڈھل کے آئے ہیں اشک آنکھوں تک

ان کو دامن سے واسطا نہ رہا

آپ پُرسانِ حالِ دل تو ہوئے

نہ رہا اب کوئی گِلا نہ رہا

کشتئ دل کو ہے خدا حافظ

غم نہیں اس کا نا خدا نہ رہا

چھا گئے دل پہ یاس کے بادل

اب تو کوئی بھی آسرا نہ رہا

غم جفا کا نہ کیجیے کہ مجھے

یہ گِلہ بھی رہا رہا نہ رہا

ہو گئے سیم و زر کے بندے سب

اب کوئی بندۂ خدا نہ رہا

غمِ عقبیٰ،۔ غمِ جہاں،۔ غمِ عشق

کسی غم میں کوئی مزا نہ رہا

اہلِ ساحل سے بحرِ غم میں حباب

دُور کا بھی تو واسطا نہ رہا

سید حباب ترمذی