عارفانہ کلام حمد نعت منقبت
تِرا نسب شہِ خوباں سے فیض یاب ہوا
تِرا لقب مِرے حیدرؑ ابو تراب ہوا
تِرے حرم میں پیمبر کی لاڈلی دختر
کچھ اس ادا سے بھی گھر تیرا لا جواب ہوا
سلام خیبر و بدر و احد کے شیر جوان
شجاعتوں کا تِرے نام انتساب ہوا
خوشا کہ تجھ سے ہوا فتح قلعۂ خیبر
خوشا کہ سرورِ دیں کا تُو انتخاب ہوا
جو تیرا ذکر ہے، اللہ کی عبادت ہے
جو تیرے چہرے کو تکنا ہوا، ثواب ہوا
وہ علم، شہر ہیں جس کے رسولِ امّی لقب
بقولِ سرورِ دیںﷺ تُو اسی کا باب ہوا
تِرے خطاب کا ہر لفظ پر اثر مولا
تِری دعا کا ہر اک حرف مستجاب ہوا
تِرا حَسنؑ ہے خلافت کا افتخار، علیؑ
تِرا حُسینؑ عزیمت کا انتساب ہوا
تِرے ہی گھر سے روایت چلی ولایت کی
اور اس میں ہر تِرا فرزند آفتاب ہوا
زبانِ کنجئ حق نے تجھے رکھا حق پر
تِرا عدو جو ہوا آخرش خراب ہوا
طفیلِ ذکرِ علیؑ یوں ملے نوید، ازہر
تُو کامیاب ہوا اور بے حساب ہوا
اویس ازہر مدنی
No comments:
Post a Comment