تو وہی ہم بھی وہی قصہ پرانا ہو گیا

تُو وہی ہم بھی وہی قصہ پرانا ہو گیا

ہم کو گھر چھوڑے ہوئے اب اک زمانہ ہو گیا

شہر میں دستار کی باتیں ہوئی تھیں رات بھر

صبح ہوتے ہی کسی کا سر نشانہ ہو گیا

پار اترنا تھا ہمیں یا ڈوب مرنا تھا ہمیں

نا خدا ہی ڈوب جانے کا بہانہ ہو گیا

بارشوں کی زد میں آ کر ڈھ گئے کچے مکان

اور تھوڑی دیر کو موسم سہانا ہو گیا

اس کو سوچا اس کو چاہا پر نہیں دیکھا اسے

ربط میرا اس سے قائم غائبانہ ہو گیا

قائم نقوی