ہر پل جلائے آنسوؤں سے دِید کے دِیے
بُجھنے نہیں دِئیے کبھی اُمید کے دیے
کابوس دیکھتا وہ رہا عمر بھر سدا
جس نے چُرائے دوسروں سے نیند کے دیے
اُکتا کے اک ہی وِرد سے تسبیح رو پڑی
پھر خُود میں خُود پِرو دئیے تجرید کے دیے
آیات حِفظ کیں تِری پھر بھی نہ جانے کیوں
سُوکھے پڑے ہیں سب تِری تاکید کے دیے
تاریکی سے جھگڑ پڑی تقلید کی دوات
اور روشنی سے جا لڑے تجدید کے دیے
کرتے ہو قید کیوں انہیں اے وقت کے یزید
سجتے ہیں صرف دار پہ توحید کے دیے
منصور! فکر کیوں کرے فردا کی کچھ ذرا
جب ساتھ ہوں حضور کی تائید کے دیے
منصور محبوب
No comments:
Post a Comment