رکھا ہے مدینے کا سفر سمت نظر میں

 عارفانہ کلام حمد نعت منقبت

رکھا ہے مدینے کا سفر سمتِ نظر میں

اشکوں کے خزانے ہیں مِرے زادِ سفر میں

بخشی مِرے دل کو تِری رحمت نے یہ رقت

امیدِ شفاعت ہے مِرے دیدۂ تر میں

وہ نُور تھا رُخ پر جو کرے آنکھ کو خِیرہ

ہے آپ کے جلوے کی جھلک شمس و قمر میں

بطحا کی طرف جاتی ہے جو راہ، مِری خاک

اے کاش بکھر جائے اسی راہگزر میں

ہے ردِّ بلا میرے لیے نامِ محمدﷺ

یہ نام سہارا ہے ہر اک خوف میں، ڈر میں

لکھتی ہوں میں جب مدحتِ سرکارِ مدینہﷺ

ڈھل جاتے ہیں الفاظ مِرے لعل و گُہر میں

کیا خوب سفر تھا، ہوئی معراج مکمل

کیا سیرِ فلک تھی کہ ہوئی ثانیہ بھر میں

ہو جائیں گی آسانی سے حل مُشکلیں میری

لب پر ہے درود، ان کی شفاعت ہے نظر میں

کر دے مِرے لفظوں کو مؤقر مِرے مولیٰ

تاثیر پذیری ہو عطا عرضِ ہُنر میں

نسرین سید