گردشِ وقت کی رفتار کے بعد
گرچہ الہام کا دروازہ نہیں وا ہوتا
کوئی زِیرک ہے جو سمجھا دے مجھے
کون سی شے ہے پسِ پردہ
مسلسل اب تک
جو میرے دل کو
تیری خیر خبر دیتا ہے؟
کون بھرتا ہے میری آنکھ میں
قصے تیرے؟
کون پلکوں پہ
تیرا عکس بنا دیتا ہے؟
کون اس دل میں
تیرا عشق بھرے جاتا ہے؟
کون یہ سُر
جو تِرے دل سے جڑے رہتے ہیں
میرے اطراف بجاتا ہے
سناتا ہے مجھے
ساری باتیں
جو تِری آنکھ سے ظاہر تھیں مگر
تُو بھی کہنے سے رہا
میں بھی سمجھنے سے رہی
گرچہ اِلہام کا در بند پڑا ہے کب سے
کون سی شے ہے پسِ پردہ
مسلسل اب تک
شبینہ آرا
No comments:
Post a Comment