حبس شب ہو تو اجالے بھی ترے شہر سے آئیں

حبسِ شب ہو تو اُجالے بھی تِرے شہر سے آئیں
خواب دیکھوں تو حوالے بھی تِرے شہر سے آئیں
تیرے ہی شہر میں سر تن سے جُدا ہو جائے
خون بہا مانگنے والے بھی تِرے شہر سے آئیں
بات تو جب ہے کہ اے گریہ کُنِ حُرمتِ حرف
مدحِ قاتل میں مقالے بھی تِرے شہر سے آئیں
محضرِ جاں طلبی پر بھی تِرے نام کی مُہر
جان سے جاؤں تو نالے بھی تِرے شہر سے آئیں
وقت اگر بیعتِ ہر سنگ پہ اصرار کرے
آئینہ مانگنے والے بھی تِرے شہر سے آئیں

افتخار عارف