میں اگر آپ سے جاؤں تو قرار آ جائے

میں اگر آپ سے جاؤں تو قرار آ جائے

پر یہ ڈرتا ہوں کہ ایسا نہ ہو یار آ جائے

کر ذرا اور بھی اے جوشِ جنوں خوار و ذلیل

مجھ سے ایسا ہو کہ ناصح کو بھی عار آ جائے

نامِ بد بختئ عشاقِ خزاں ہے بلبل

تُو اگر نکلے چمن سے تو بہار آ جائے

جیتے جی غیر کو ہو آتشِ دوزخ کا عذاب

گر مری نعش پہ وہ شعلہ عذار آ جائے

کلفتِ ہجر کو کیا روؤں ترے سامنے میں

دل جو خالی ہو تو آنکھوں میں غبار آ جائے

محوِ دلدار ہوں کس طرح نہ ہوں دشمنِ جاں

مجھ پہ جب ناصحِ بے درد کو پیار آ جائے

ٹھیر جا جوشِ تپش ہے تُو تڑپنا، لیکن

چارہ سازوں میں ذرا دم دلِ زار آ جائے

حسنِ انجام کا مومؔن مرے بارے ہے خیال

یعنی کہتا ہے وہ کافر کہ تُو مارا جائے

مومن خان مومن