اس طرف بھی کرم اے رشک مسیحا کرنا

اس طرف بھی کرم اے رشکِ مسیحا کرنا

کہ تمہیں آتا ہے بیمار کو اچھا کرنا

بے خودِ جلوہ سے کہتا ہے جلوہ ان کا

لطفِ نظارہ اٹھا ہوش سنبھالا کرنا

اے جنوں کیوں لیے جاتا ہے بیاباں میں مجھے

جب تجھے آتا ہے گھر کو میرے صحرا کرنا

جب بجُز تیرے کوئی دوسرا موجود نہیں

پھر سمجھ میں نہیں آتا تیرا پردہ کرنا

یہی دو کام ہیں ناکامِ محبت کے لیے

کبھی ان کا کبھی تقدیر کا شکوہ کرنا

ہم بھی دیکھیں تیرے آئینۂ رخ کو لیکن

شاق ہے گردِ نظر سے اسے دھندلا کرنا

کوئی جا ہو، حرم ہو، کہ صنم خانہ ہو

ہم کو نقشِ قدمِ یار پہ سجدہ کرنا

دیکھ لے جا کے وہ دریا پہ تماشاۓ حباب

جس کو منظور ہو نظارۂ دنیا کرنا

پردۂ ہستیِ موہوم ہٹا دو پہلے

پھر جہاں چاہو وہاں یار کو دیکھا کرنا

شکوہ اور شکوۂ محبوب الہٰی توبہ

کفر ہے مذہبِ عشاق پہ شکوہ کرنا

ایک تم ہو کہ تمہیں بات کا کچھ پاس نہیں

اور ایک ہم کہ ہمیں منہ سے جو کہنا کرنا

وہ میرے اشک کو دامن میں جگہ دیتے ہیں

یعنی منظور ہے اس قطرے کو دریا کرنا

ایسی آنکھوں کے تصدق مری آنکھیں بیدؔم

کہ جنہیں آتا ہے اغیار کو اپنا کرنا

بیدم شاہ وارثی