کئی پڑے ہیں فریبی حصار شیشے میں

کئی پڑے ہیں فریبی حصار شیشے میں

اٹھا کے سنگِ گراں کوئی مار شیشے میں

جہانِ تازہ کی تسخیر بعد میں کرنا

تو اپنے دل کو تو پہلے اتار شیشے میں

یہ کس کا عکس فروزاں ہے بر دلِ درویش

دھمال کرنے لگی ہے بہار شیشے میں

کبھی تو آ، دلِ مجذوب کی تسلی کو

مزید بڑھنے لگا انتظار شیشے میں

تو خود کو کھوج ذرا، اور آئینے میں دیکھ

پڑے ہیں عیب تِرے بے شمار شیشے میں

اگرچہ پشت کیے بیٹھا تھا مِری جانب

وہ دیکھتا تھا مجھے بار بار شیشے میں

پرانے خال و خد اپنے نکھارتے ہوئے وہ

ہزار بار ہوا اشک بار شیشے میں

سنور رہا تھا مقابل تھے آئینے اور میں

مجھے بھی اس نے کیا تھا شمار شیشے میں

بس ایک شخص ہے احمد جو مجھ کو جانتا ہے

میں دیکھتا ہوں اسے غمگسار شیشے میں

احمد ساقی