کسی گرداب کی پھینکی پڑی ہے

کسی گرداب کی پھینکی پڑی ہے

لبِ ساحل جو اک کشتی پڑی ہے

حقیقت میں وہی سیدھی پڑی ہے

مجھے اک چال جو الٹی پڑی ہے

سفر الجھا دیئے ہیں اس نے سارے

میرے پیروں میں جو تیزی پڑی ہے

وہ "ہنگامہ" گزر جاتا ادھر سے

مگر رستے میں خاموشی پڑی ہے

ہوا ہے قتل بے داری کا جب سے

یہ بستی رات دن سونی پڑی ہے

پتنگ کٹنے کا باعث اور ہے کچھ

اگرچہ ڈور بھی الجھی پڑی ہے

ذرا کوئل کا پنجرہ کھل گیا تھا

ابھی تک خوف سے سہمی پڑی ہے

بڑی بنجر تھی یہ کھیتی لیاقت

مگر کچھ روز سے سینچی پڑی ہے

لیاقت جعفری