دیر و حرم میں بحث رہی دل کہاں رہے

 دیر و حرم میں بحث رہی دل کہاں رہے

آخر کو طے ہوا کہ بے خانماں رہے

دل کا محیطِ حسن میں کیونکر نشاں رہے

جب ہر جگہ خدا ہو تو بندہ کہاں رہے

جب دل میں امتیاز بہار و خزاں نہیں

صحرا ہو یا چمن ہو کہیں آشیاں رہے

سجدہ کریں اسے حرم و دیر کیا عجب

جس کے دل و دماغ میں ترا آشیاں رہے

رکتی ہو جو زباں، نگہہ واپسیں سہی

موقوف کیوں یہ سلسلۂ داستاں رہے

ناطق کلام تجھ سے کن الفاظ میں کرے

جب تیرے دل پہ معنئ نازک گراں رہے

ناطق لکھنوی