میری تقویم میں کیا حرف کا پھل ہے مرے دوست

 میری تقویم میں کیا حرف کا پھل ہے مرے دوست

میں پڑھوں اور تُو کہے کہ غزل ہے مرے دوست

حرف کندہ ہے محبت کا سرِ لوحِ ازل

یہ کدورت تو رویوں کا خلل ہے مرے دوست

محض نسبت ہی نہیں، دوہری نسبت ہے مجھے

آنکھ وہ جھیل ہے اور جھیل بھی ڈل ہے مرے دوست

میں الگ زاویے سے دیکھتا ہوں دنیا کو

کیا مرے مسئلے کا بھی کوئی حل ہے مرے دوست

کیا چُنوں تیرے علاوہ، اور اگر چُن بھی لوں

کیا یہاں سانس کا بھی کوئی بدل ہے مرے دوست

اس کے سر سے میں ابھی وار دوں صدیوں کا سکون

تیری قربت میں جو گزرا ہوا پَل ہے مرے دوست

چاہتا ہوں تُو رویے پہ ذرا غور کرے

ورنہ دنیا تو مکافاتِ عمل ہے مرے دوست

گردشِ وقت کا ساگر تجھے ادراک بھی ہے

آج تیرا تو کسی اور کا کل ہے مرے دوست

مسعود ساگر