تمہیں پانے کی چاہت ہے مگر کھونے کا ڈر بھی ہے

 تمہیں پانے کی چاہت ہے مگر کھونے کا ڈر بھی ہے

کہ دل شہرِ تمنا ہے تو محرومی کا گھر بھی ہے

وفا کے باغ میں جھولے پڑے ہیں آرزوؤں کے

دعاؤں کی ہری بیلوں پہ خواہش کا ثمر بھی ہے

مسافت نا امیدی کی پڑی ہے پاؤں میں میرے

تمہاری ہمرہی بھی ہے مگر تنہا سفر بھی ہے

فصیلِ فکر پہ یادوں کی اک قندیل روشن ہے

تمہاری منتظر میں ہی نہیں یہ چشمِ تر بھی ہے

چمکتی کانچ جیسی دھڑکنوں کو توڑنے والا

وہ پتھر دل بہت مانا ہوا اک شیشہ گر بھی ہے

ہماری ایک خامی ہے تمہاری ذات میں کھونا

تمہیں تم سے چرا لینا ہمارا اک ہنر بھی ہے

سنو! تم کہہ رہے تھے ناں دعا میں مانگ لو مجھ کو

مگر تم سوچ لو مری دعاؤں میں اثر بھی ہے

کبھی تم چاند سے کہنا مرے آنگن میں بھی اترے

سڑک کے پار کچے راستے پر میرا گھر بھی ہے

کنول اعزاز بھی کہتی ہے اس کو جرم بھی دنیا

کہ بدنامِ زمانہ بھی، محبت معتبر بھی ہے

کنول ملک