تو آسمان کا تنہا ستارہ تھوڑی ہے

 تُو آسمان کا تنہا ستارہ تھوڑی ہے

بس ایک تجھ پہ ہمارا گزارہ تھوڑی ہے

تمہارے حسن سے آگے بھی منزلیں ہیں بہت

یہ بحر شوق ہے اس کا کنارہ تھوڑی ہے

کسی سے بڑھ کے تمہیں ہم بھی چاہ سکتے ہیں

محبتوں پہ کسی کا اجارہ تھوڑی ہے

یہ بات کہہ کے بھی دل کو سکوں نہیں ملتا

وہ ڈوبتا ہے تو ڈوبے ہمارا تھوڑی ہے

فقط کنارہ کیا ہے جہان سے دل نے

مصیبت غم دوراں سے ہارا تھوڑی ہے

ہر ایک شخص یہاں ہے میان خواہش و خواب

یہ جھگڑا صرف ہمارا تمہارا تھوڑی ہے

بقول شاعر خوش طبع اس ہوا میں حنیف

بہ عیش کوش کہ عالم دوبارہ تھوڑی ہے

محمد حنیف