وابستگی ذات سے آگے کی بات کر

 وابستگیِ ذات سے آگے کی بات کر

اس عرصۂ حیات سے آگے کی بات کر

اب ساتواں جہاں بھی تِرے ساتھ چاہیے

اے دوست شش جہات سے آگے کی بات کر

جذباتِ کیف و مستی، سرورِ بدن وصال

اور سب جمالیات سے آگے کی بات کر

اب بس کہ ہو چکا ہے یہ ہونی کا تذکرہ

کرنی ہے تو ثبات سے آگے کی بات کر

بکھری پڑی ہیں ہر سو رویوں کی کرچیاں

اپنوں کے التفات سے آگے کی بات کر

میں جانتی ہوں کون کسے چھوڑ جائے گا

تُو سب تحفظات سے آگے کی بات کر

تُو مجھ سے کہہ رہا ہے کہ دنیا گھماؤں گا

کم ظرف! کائنات سے آگے کی بات کر

چپ رہ کے مجھ کو دیکھ تجھے دیکھتی ہوں میں

یعنی ہر ایک بات سے آگے کی بات کر

فاخرہ انجم