پھول کے ساتھ لگے خار سے اکتائے ہوئے

 پھول کے ساتھ لگے خار سے اُکتائے ہوئے 

ہم تِری بزم میں اغیار سے اکتائے ہوئے

ایک تو یہ ہمیں مرضی سے نہ چلنے دے گی 

ہم ہیں اجداد کی دستار سے اکتائے ہوئے

جی مچلتا ہے وہاں دیکھ کے ہر نادر شے  

ہم تہی جیب ہیں بازار سے اکتائے ہوئے

جب کہا؛ دوڑ ذرا، تُو تبھی لنگڑانے لگی 

زندگی ہم تِری رفتار سے اکتائے ہوئے

وہ فصاحت، وہ فسوں غیر کے لہجے میں کہاں

ہم تِرے بعد ہیں گفتار سے اکتائے ہوئے

ایک میں ہوں کہ محبت ہے لبالب مجھ میں 

اور اک تم مِرے اظہار سے اکتائے ہوئے

اک دو احباب تھے اپنے بھی گریزاں ہم سے 

ہم بھی رہنے لگے دو چار سے اکتائے ہوئے

ہم کو بے پایاں سہولت ہے طلب میں ان کی 

پر وہ رہتے ہیں طلبگار سے اکتائے ہوئے

کس ملاقات میں چُومو گے؟" ہمیشہ پوچھا"

ہم ہیں ہر بار کے "اِس بار" سے اکتائے ہوئے

تم کو دیکھیں تو حواس اپنے سنبھالیں کیسے 

عاشقِ دید بھی دیدار سے اکتائے ہوئے

خواب میں وصل کی امید سکوں دے ان کو 

ہجر زادے دمِ بیدار سے اکتائے ہوئے

منہ بناتے ہیں ستمگار لکھوں جب ان کو 

میرے پیتم مِرے اشعار سے اکتائے ہوئے

ان کو سنتا ہی نہیں کوئی سو سب گیت شفق 

تیری پازیب کی جھنکار سے اکتائے ہوئے

عائشہ شفق